محکمۂ ریلوے اور انکم ٹیکس میں رشوت خوری کے دو بڑے انکشافات
سی بی آئی نے اعلیٰ افسران کو رنگے ہاتھوں گرفتار کیا
نئی دہلی، 25 اپریل (نمائندہ خصوصی)
مرکزی تفتیشی بیورو (سی بی آئی) نے آج دو الگ الگ مقدمات میں بڑی کارروائی کرتے ہوئے بدعنوانی کے الزامات میں دو سرکاری افسران سمیت چھ افراد کو گرفتار کر لیا ہے۔ گرفتار ہونے والوں میں ساؤتھ ایسٹ سینٹرل ریلوے، بلاسپور کے چیف انجینئر (IRSE:2000) اور انکم ٹیکس محکمہ کے ڈپٹی کمشنر رینک کے آئی آر ایس آفیسر شامل ہیں۔پہلے کیس میں سی بی آئی نے ساؤتھ ایسٹ سینٹرل ریلوے میں رشوت خوری کے الزام میں چار افراد کو گرفتار کیا، جن میں چیف انجینئر، ان کے اہل خانہ کا ایک فرد، ایک نجی کمپنی کا مینیجنگ ڈائریکٹر اور اس کا ملازم شامل ہے۔ یہ گرفتاریاں اس وقت عمل میں آئیں جب انجینئر کے رشتہ دار نے رنچی میں 32 لاکھ روپے رشوت کی رقم وصول کی، جو ریلوے کے جاری تعمیراتی ٹھیکوں میں رعایت کے عوض دی گئی تھی۔سی بی آئی نے مذکورہ اہلکار کے خلاف کارروائی کرتے ہوئے مختلف مقامات پر چھاپے مارے، جن میں بلاسپور اور رنچی شامل ہیں، اور تلاشی کے دوران بڑی مقدار میں نقدی اور قابلِ اعتراض دستاویزات برآمد ہوئیں۔دوسرے مقدمے میں سی بی آئی نے انکم ٹیکس محکمہ کی جانب سے شروع کی گئی 'فیس لیس اسکیم' کو ناکام بنانے کی کوشش پر کارروائی کرتے ہوئے ایک آئی آر ایس آفیسر (ڈپٹی کمشنر آف انکم ٹیکس) اور ایک نجی شخص کو گرفتار کیا ہے۔تحقیقات سے معلوم ہوا ہے کہ ان افسران اور نجی افراد نے کئی بڑے ٹیکس دہندگان سے رابطہ کیا اور ان سے وعدہ کیا کہ وہ ان کے زیرِ التواء انکم ٹیکس اسیسمنٹ کیسز میں سازگار فیصلے دلوائیں گے، بشرطیکہ انہیں مالی فائدہ پہنچایا جائے۔ یہ لوگ اسکیم کے اندرونی راز مثلاً اسیسمنٹ آفیسر کا نام، کیس کی تفصیلات وغیرہ غیر قانونی طور پر فراہم کرتے تھے۔فیس لیس اسکیم، حکومت ہند کی ایک بڑی اصلاحی کوشش تھی جس کا مقصد ٹیکس اسیسمنٹ کو شفاف اور بدعنوانی سے پاک بنانا تھا۔ تاہم سی بی آئی کی تحقیق کے مطابق چند افسران نے اس اصلاحی نظام کو ذاتی فائدے کے لیے سبوتاژ کیا۔اس سے قبل سی بی آئی نے 6 فروری 2025 کو دہلی، ممبئی، پٹنہ، بنگلورو، کیرالہ سمیت 18 مقامات پر چھاپے مارے تھے، جہاں سے کئی ڈیجیٹل ثبوت، رشوت کی ادائیگی کے شواہد اور اہم دستاویزات برآمد کی گئی تھیں۔یہ مقدمہ ابتدائی طور پر انکم ٹیکس محکمہ کی شکایت پر درج کیا گیا تھا، جس میں ایک ڈپٹی کمشنر، دو انکم ٹیکس انسپکٹرز، پانچ چارٹرڈ اکاؤنٹنٹس اور دیگر نامعلوم افراد کو شامل کیا گیا تھا۔سی بی آئی کا کہنا ہے کہ دونوں مقدمات کی تفتیش جاری ہے اور مزید گرفتاریاں خارج از امکان نہیں۔
Post a Comment