سدارامیا کی مرکزی وزیر نتن گڈکری سے ملاقات
ریاست کے اہم ترقیاتی منصوبوں کی منظوری کا مطالبہ
نئی دہلی، 2 اپریل (حقیقت ٹائمز)
وزیر اعلیٰ کرناٹک سدارامیا نے آج دہلی میں مرکزی وزیر برائے سڑک ٹرانسپورٹ اور ہائی ویز نتن گڈکری سے ملاقات کی اور ریاست میں سڑکوں اور قومی شاہراہوں کی ترقی کے لیے ایک تفصیلی یادداشت پیش کی۔ وزیر اعلیٰ نے مرکزی حکومت کی جانب سے ریاست میں قومی شاہراہوں کے نیٹ ورک کے فروغ میں تعاون پر اظہار تشکر کرتے ہوئے مختلف جاری اور مجوزہ ترقیاتی منصوبوں کی منظوری کی درخواست کی۔وزیر اعلیٰ نے میسور شہر میں منی پال اسپتال جنکشن پر فلائی اوور کی تعمیر، ہبلی-دھارواڑ بائی پاس، شیراوتی بیک واٹر پر سگانڈور برج، کرشنا ندی پر پل، ہوسپٹ-بلاری سیکشن میں دو لین اوور برج اور سندگیری-بلاری سیکشن کو دو لین میں تبدیل کرنے جیسے اہم منصوبوں کی تفصیلات پیش کیں۔ریاستی حکومت نے قومی شاہراہوں کے منصوبوں کو جلد مکمل کرنے کے لیے زمین کے حصول کے عمل کو تیز کرنے کے ساتھ ساتھ دیگر ضروری اقدامات شروع کر دیے ہیں۔ وزیر اعلیٰ نے بتایا کہ سڑکوں کی تعمیر کے لیے درکار زمین کی خریداری کے عمل کو تیز کرنے کے لیے متعلقہ محکموں کے ساتھ اجلاس منعقد کیے جا رہے ہیں، جبکہ پانی اور بجلی کی سہولیات کی منتقلی جیسے امور پر بھی فوری عمل درآمد کیا جا رہا ہے۔وزیر اعلیٰ نے مزید کہا کہ ریاست میں قومی شاہراہوں کی بہتری اور سڑکوں کے بنیادی ڈھانچے کو مضبوط بنانے کے لیے کئی دیگر منصوبے بھی پیش کیے گئے ہیں، جن میں میسور کے نیشنل ہائی وے 275 پر 9 گریڈ سیپریٹرز کی تعمیر، شراڈی گھاٹ پر سرنگ کی تعمیر، پونے-بنگلور گرین فیلڈ ایکسپریس وے کی منظوری، قومی شاہراہوں کی تعمیر کے لیے 24,000 کروڑ روپے کے فنڈز کی منظوری، بنگلور کے ہیبال جنکشن پر اوور برج، بیلگاوی شہر میں ایلیویٹڈ کوریڈور اور کلبرگی-واڈی-یادگیر-کینڈے چور-جڈچرلا سیکشن میں چارسڑکوں والی ہائی وے شامل ہیں۔وزیر اعلیٰ نے مرکزی وزیر سے درخواست کی کہ ان تمام ترقیاتی منصوبوں کو جلد از جلد منظوری دی جائے تاکہ کرناٹک میں سڑکوں کے بہتر انفراسٹرکچر کی فراہمی کو یقینی بنایا جا سکے، جس سے نہ صرف سفری سہولیات میں بہتری آئے گی بلکہ ریاستی معیشت کو بھی فروغ حاصل ہوگا۔
Post a Comment