نیویارک میں ہولناک ہیلی کاپٹر حادثہ
اسپین کے معروف صنعتی خاندان کے 6 افراد ہلاک
نیویارک، 11 اپریل(حقیقت ٹائمز)
نیویارک کے ہڈسن دریا میں ایک دل دہلا دینے والا ہیلی کاپٹر حادثہ پیش آیا جس میں اسپین کے معروف صنعتی ادارے سے وابستہ خاندان کے چھ افراد جان کی بازی ہار گئے۔ حادثہ اُس وقت پیش آیا جب "بیل 206 لانگرینجر IV" ماڈل کا ایک سیاحتی ہیلی کاپٹر نیویارک شہر کے ڈاؤن ٹاؤن ہیلی پیڈ سے پرواز بھرنے کے کچھ ہی دیر بعد توازن کھو بیٹھا اور مقامی وقت کے مطابق دوپہر تقریباً تین بج کر سترہ منٹ پر ہڈسن دریا میں جا گرا۔اسپین سے تعلق رکھنے والے سیمنز اسپین کے صدر آگسٹن اسکوبار، اُن کی اہلیہ مرسے کامپروبی مونتال، اور ان کے تین بچے اس پرواز میں سوار تھے۔ پائلٹ سمیت تمام چھ افراد موقع پر ہی ہلاک ہو گئے۔ حادثے کی ویڈیو فوٹیج میں ایک بھاری شے کو دریا میں گرتے ہوئے اور بعد ازاں ہیلی کاپٹر کے بلیڈ کو پانی پر تیرتے دیکھا جا سکتا ہے۔ کچھ ہی لمحوں میں پولیس، فائر بریگیڈ اور ایمرجنسی ٹیمیں موقع پر پہنچ گئیں اور ریسکیو آپریشن کا آغاز ہوا، تاہم بدقسمتی سے کسی بھی مسافر کو زندہ نہیں بچایا جا سکا۔نیویارک پولیس کمشنر جیسیکا ٹش نے میڈیا کو بتایا کہ ہیلی کاپٹر حادثے سے کچھ دیر قبل پائلٹ نے ایندھن کی کمی کی اطلاع دی تھی اور ممکنہ تکنیکی خرابی کا بھی عندیہ دیا تھا۔ ہیلی کاپٹر نے پرواز کے آغاز میں شمال کی سمت پرواز کی، لیکن جارج واشنگٹن برج کے قریب پہنچتے ہی جنوبی سمت مڑتے وقت حادثے کا شکار ہو گیا۔ یہ مقام نیو جرسی کے شہر ہوبوکن کے قریب واقع ہے جہاں سے یہ دریا میں جا گرا۔آگسٹن اسکوبار کو اسپین کے بااثر اور صنعتی حلقوں میں ایک کامیاب کاروباری شخصیت کے طور پر جانا جاتا تھا، جب کہ ان کی اہلیہ مرسے کاتالونیا کے ایک معزز خاندان سے تعلق رکھتی تھیں، جن کے دادا اور پردادا ایف سی بارسلونا کے صدر بھی رہ چکے ہیں۔ ان کے بچوں کی کم عمری اس حادثے کو مزید اندوہناک بنا دیتی ہے۔اس واقعے نے صرف اسپین ہی نہیں بلکہ دنیا بھر میں غم و افسوس کی لہر دوڑا دی ہے۔ نیویارک کے میئر ایرک ایڈمز نے بھی اس واقعے پر گہرے دکھ کا اظہار کرتے ہوئے کہا کہ یہ سانحہ پوری انسانیت کے لیے ایک صدمہ ہے۔ اسپین کی حکومت اور عالمی برادری نے بھی تعزیت کا اظہار کیا ہے۔حادثے کی تحقیقات فی الحال نیشنل ٹرانسپورٹیشن سیفٹی بورڈ (NTSB) اور فیڈرل ایوی ایشن ایڈمنسٹریشن (FAA) کی نگرانی میں جاری ہیں، اور جلد اس سانحے کی اصل وجوہات کو عوام کے سامنے لانے کا وعدہ کیا گیا ہے۔ یہ المناک واقعہ ایک مرتبہ پھر سیاحتی اور تجارتی پروازوں میں حفاظتی اقدامات پر سوالیہ نشان بن کر ابھرا ہے۔
Post a Comment