کرناٹک میں ملک کا سب سے بلند امبیڈکر مجسمہ اور میوزیم تعمیر ہوگا: سدارامیا کا اعلان
بنگلور 14اپریل (حقیقت ٹائمز)
بنگلورو کے بھارت جوڑو بھون میں منعقدہ 134ویں امبیڈکر جینتی کے موقع پر وزیراعلیٰ سدارامیا نے اعلان کیا کہ ریاست میں ڈاکٹر بی آر امبیڈکر کا ایک شاندار میوزیم تعمیر کیا جائے گا اور پورے ہندوستان میں سب سے بلند قامت امبیڈکر مجسمہ بھی کرناٹک کی سرزمین پر نصب کیا جائے گا۔ انہوں نے اس موقع پر بی جے پی اور آر ایس ایس کے نظریاتی حملوں کا مدلل جواب دیتے ہوئے کہا کہ آج ہمیں جھوٹ کے خلاف سچ بولنے کی ہمت پیدا کرنی ہے۔ ان کے مطابق بی جے پی اور اس کی نظریاتی تنظیمیں جھوٹ کا پرچار کرکے منووادی نظام کو دوبارہ مسلط کرنے کی کوشش کر رہی ہیں، جسے صرف نظریاتی فہم اور سچائی کے جذبے سے ہی روکا جا سکتا ہے۔سدارامیا نے مزید کہا کہ کانگریس کے کارکنوں کو چاہیے کہ وہ ڈاکٹر امبیڈکر کے نظریات کو پوری سچائی اور گہرائی سے سمجھیں، کیونکہ جب تک نظریاتی شعور پیدا نہ ہو، سیاسی جدوجہد محض رسمی بن کر رہ جاتی ہے۔ انہوں نے یاد دلایا کہ ڈاکٹر امبیڈکر نے خود منوسمرتی کو جلایا تھا کیونکہ وہ اسے عدم مساوات اور انسانی استحصال کی بنیاد سمجھتے تھے۔ آج بھی انہی خیالات کے خلاف لڑنا وقت کا تقاضہ ہے۔وزیراعلیٰ نے انکشاف کیا کہ 1952 میں امبیڈکر نے اپنے ہاتھ سے تحریر کردہ ایک خط میں واضح طور پر ساورکر اور ڈھانگے کو اپنی انتخابی شکست کا ذمہ دار ٹھہرایا تھا۔ اس کے باوجود بی جے پی کی قیادت عوام میں یہ جھوٹ پھیلا رہی ہے کہ امبیڈکر کو کانگریس نے ہرایا۔ سچ کے ساتھ کھڑے ہونے کی جس جرأت کی آج ضرورت ہے، اسی کو کانگریس کو اپنانا ہوگا۔سدارامیا نے کہا کہ امبیڈکر کی تعلیمات صرف دلتوں تک محدود نہیں بلکہ ان تمام طبقات کے لیے مشعل راہ ہیں جو صدیوں سے تعلیم، روزگار اور انصاف سے محروم رکھے گئے۔ آئین کے نفاذ کے دن امبیڈکر نے کہا تھا کہ ہم ایسی سماجی، معاشی اور تعلیمی نابرابری والے معاشرے میں داخل ہو رہے ہیں جہاں یہ عدم مساوات ختم نہ ہوئی تو آئین کی روح کبھی پوری نہیں ہو سکے گی۔وزیراعلیٰ نے یاد دلایا کہ امبیڈکر نے خود کہا تھا کہ انہوں نے تعلیم اسی لیے حاصل کی تاکہ وہ چھوت چھات اور نابرابری کے خلاف جدوجہد کر سکیں۔ اسی پیغام کو آگے بڑھانے کی آج بھی ضرورت ہے۔ ان کے بقول، بی جے پی صرف ساورکر اور گوڈسے کو اہمیت دیتی ہے، جنہوں نے ملک میں فرقہ وارانہ سیاست اور تشدد کو فروغ دیا، جبکہ کانگریس کے لیے امبیڈکر وہ رہنما ہیں جنہوں نے تعلیم، تنظیم اور جدوجہد کا راستہ دکھایا۔سدارامیا نے وزیراعظم نریندر مودی کو براہ راست چیلنج کیا کہ اگر وہ واقعی پسماندہ طبقات کے حق میں سنجیدہ ہیں، تو ریاستِ کرناٹک میں نافذ کیے گئے SCP/TSP قانون کو پورے ہندوستان میں نافذ کرکے دکھائیں۔ ان کے مطابق صرف تقاریر اور اعلانات کافی نہیں، اب وقت ہے کہ مرکز کی حکومت عملی اقدامات سے اپنی نیت ثابت کرے۔
Post a Comment