ریاست کی ترقی میں نظم و نسق کا اہم کردار
منشیات سے پاک کرناٹک کا عزم: سدارامیا
بنگلور، 2 اپریل(حقیقت ٹائمز)
وزیراعلی سدارامیا نے آج کہا کہ ریاست میں قانون و نظم و نسق، سرمایہ کاری، ترقی اور روزگار کی تخلیق ایک دوسرے سے براہ راست جڑے ہوئے ہیں۔ بے روزگاری ایک بہت بڑا مسئلہ بنتی جارہی ہے، اور اسے قابو میں رکھنے کے لیے امن و امان اور قانون کی پاسداری کو برقرار رکھنا ضروری ہے۔ کورمنگلا پولیس پریڈ گراؤنڈ میں منعقدہ پولیس کے یوم تاسیس میں وزیر اعلیٰ نے میڈل یافتہ پولیس اہلکاروں کو انعامات سے نوازا اور ان کی خدمات کو سراہا۔انہوں نے کہا کہ گزشتہ تین سالوں سے زیر التوا وزیراعلیٰ میڈل اس بار ایک ساتھ تقسیم کیے گئے ہیں، اور وہ تمام انعام یافتگان کو مبارکباد پیش کرتے ہیں۔وزیر اعلیٰ نے کہا کہ ٹیکنالوجی کی ترقی کے ساتھ ساتھ سائبر جرائم میں بھی اضافہ ہورہا ہے، اور ہمیں جدید ٹیکنالوجی کا مؤثر استعمال کرتے ہوئے ان جرائم کو روکنے کے لیے اقدامات کرنے ہوں گے۔انہوں نے کہا، "میرا مقصد ریاست کو منشیات سے پاک بنانا ہے، اور اس کے لیے پولیس کو بھرپور محنت کرنی ہوگی۔ منشیات کے نیٹ ورک کو جڑ سے اکھاڑ پھینکنے کے لیے سخت اقدامات کیے جانے چاہئیں۔"وزیراعلیٰ سدارامیا نے مزید کہا کہ پولیس کے تمغے جیتنے والے اہلکاروں کو دوسروں کے لیے مثال بننا چاہیے، اور یہ تمغے صرف مہارت، ایمانداری اور پیشہ ورانہ رویے کے ساتھ ہی حاصل کیے جا سکتے ہیں۔انہوں نے اعداد و شمار کا حوالہ دیتے ہوئے کہا کہ گزشتہ دو سالوں میں جرائم کی شرح میں کمی آئی ہے، اور اس میں مزید کمی لانے کے لیے سخت اقدامات کیے جانے چاہئیں۔انہوں نے مزید کہا کہ جرمنی کے وزراء اور نمائندوں نے ریاستی پولیس کی مہارت اور پیشہ ورانہ صلاحیتوں کی تعریف کی ہے، جو ہمارے لیے فخر کی بات ہے۔وزیراعلیٰ نے یقین دہانی کرائی کہ پولیس کی ضروریات اور مطالبات کو پورا کرنے کے لیے حکومت ہمیشہ تیار ہے، تاہم، اپنے فرائض سے کوتاہی برتنے کو کسی صورت برداشت نہیں کیا جائے گا۔ انہوں نے پولیس اہلکاروں کو ہدایت دی کہ وہ "بیٹ" سسٹم کو مزید مؤثر بنائیں اور غنڈہ گردی اور بدمعاشی کو مکمل طور پر ختم کریں۔ وزیراعلی نے کہا،حکومت پولیس ڈیپارٹمنٹ اور اس کے عملے کو ہر ممکن سہولت اور تعاون فراہم کرنے کے لیے تیار ہے۔ حالیہ بجٹ میں جو بھی سہولتیں اور مراعات محکمہ پولیس کے لیے اعلان کی گئی ہیں، ان پر جلد عمل درآمد ہوگا۔اس موقع پر وزیر داخلہ ڈاکٹر جی۔ پرمیشور، داخلہ امور کے ایڈیشنل چیف سکریٹری اوما شنکر، ریاست کے ڈائریکٹر جنرل آف پولیس (ڈی جی پی) الوک موہن، وزیراعلیٰ کے سیاسی سکریٹری نصیر احمد، اور وزیراعلیٰ کے ایڈیشنل چیف سکریٹری ایل کے عتیق بھی موجود تھے۔اس موقع پر وزیر اعلٰی میڈل حاصل کرنے والوں میں ریاستی انٹلی جنس کے ڈائریکٹر ہیمنت نمبالکر کے علاوہ دیگر پولیس افسران بھی شامل ہیں۔
Post a Comment