جموں و کشمیر اسمبلی میں وقف ترمیمی قانون کے خلاف قرارداد
ایوان میں ہنگامہ، ارکان ایوان سے باہر نکالے گئے
جموں، 8 اپریل (حقیت ٹائمز )
جموں و کشمیر اسمبلی میں آج اُس وقت شدید ہنگامہ آرائی دیکھنے میں آئی جب پیپلز ڈیموکریٹک پارٹی نے مرکز کی جانب سے منظور شدہ وقف ترمیمی قانون کو منسوخ کرنے کے مطالبے پر مبنی قرارداد ایوان میں پیش کی۔پیپلز ڈیموکریٹک پارٹی کے ارکان کا کہنا تھا کہ یہ قانون ریاستی اختیارات میں مداخلت کے مترادف ہے اور مسلمانوں کے مذہبی و فلاحی اداروں کے خود مختار نظام کو متاثر کرتا ہے۔نیشنل کانفرنس کے رکن اسمبلی الطاف کالو نے ایوان کی کارروائی روکنے کے لیے تحریک التوا پیش کی اور اسپیکر سے بولنے کی اجازت مانگی، تاہم اسپیکر کی جانب سے کوئی جواب نہ ملنے پر حزبِ اختلاف کے ارکان نے سخت ردعمل ظاہر کیا۔پیپلز ڈیموکریٹک پارٹی کے رکن اسمبلی وحید پرا اور دیگر ارکان نے احتجاج کرتے ہوئے ایوان کے وسط میں پہنچ کر کاغذات لہرائے اور حکومت سے مطالبات پیش کیے۔ اس پر اسمبلی کے عملے نے مداخلت کرتے ہوئے مذکورہ ارکان کو ایوان سے باہر نکال دیا۔اسی دوران نیشنل کانفرنس کے کئی ارکان بھی ایوان کے وسط تک پہنچ گئے، جہاں اُن کی جموں و کشمیر پیپلز کانفرنس کے سربراہ سجاد لون سے تکرار ہوئی۔ دونوں جماعتوں کے ارکان کے درمیان سخت جملوں کا تبادلہ بھی ہوا، جس کے باعث ایوان کا ماحول مزید کشیدہ ہو گیا۔ایوان میں پیدا ہونے والی اس ہنگامہ خیز صورتحال کے بعد کارروائی کچھ دیر کے لیے متاثر رہی۔ پیپلز ڈیموکریٹک پارٹی اور نیشنل کانفرنس نے الزام عائد کیا کہ مرکز کی جانب سے وقف قوانین میں تبدیلی کا مقصد ریاست کی مسلم شناخت اور مذہبی خودمختاری کو نقصان پہنچانا ہے۔
Post a Comment