مہنگائی اور عوام دشمن پالیسیوں کے خلاف بلگاوی میں کانگریس کا احتجاج
بی جے پی اور آر ایس ایس کی دھمکیوں سے مرعوب نہیں ہوں گے: سدارامیا
بیلگاوی، 28 اپریل (نامہ نگار )
وزیر اعلیٰ سدارامیا نے مرکزی حکومت پر کڑی تنقید کرتے ہوئے کہا ہے کہ بھارتیہ جنتا پارٹی (بی جے پی) اور آر ایس ایس کی دھمکیوں سے ہم ہرگز مرعوب نہیں ہوں گے۔ بی جے پی اور سنگھ پریوار کا ہم بھرپور مقابلہ کریں گے۔وہ آج یہاں آل انڈیا کانگریس کمیٹی کی جانب سے مہنگائی اور عوام دشمن پالیسیوں کے خلاف منعقدہ احتجاجی جلسہ سے خطاب کر رہے تھے۔سدارامیا نے کہا کہ پچھلے دس برسوں میں مرکزی حکومت نے چاول، تیل، دالیں، کھاد، سونا، چاندی، ڈیزل، پٹرول اور گیس سلنڈر سمیت تمام ضروری اشیاء کی قیمتوں میں بے تحاشا اضافہ کیا ہے، جس نے عوام کی زندگی اجیرن بنادی ہے۔انہوں نے سوال کیا کہ مودی حکومت نے مہنگائی کے سوا ملک میں آخر کیا ترقیاتی کام انجام دیے ہیں؟جلسہ کے دوران بی جے پی کارکنوں کی جانب سے ہنگامہ آرائی پر وزیر اعلیٰ نے برہمی کا اظہار کرتے ہوئے کہا کہ جب ملک کی آزادی کی جنگ لڑی جا رہی تھی، اس وقت بی جے پی اور آر ایس ایس کہاں تھے؟ انہوں نے کہا کہ انگریزوں کے خلاف لڑنے کے بجائے آپ نے آزادی کی تحریک سے کنارہ کشی اختیار کی تھی۔وزیر اعلیٰ نے کشمیر میں حالیہ دنوں پیش آئے ہلاکتوں کا حوالہ دیتے ہوئے کہا کہ کرناٹک کے تین شہریوں سمیت متعدد بے گناہوں کا قتل مرکزی حکومت کی سکیورٹی ناکامی کا ثبوت ہے۔ سدارامیا نے کہا کہ عوام کو سوال کرنے کا حق حاصل ہے، اور سوالات پر جلسہ میں خلل ڈالنا جمہوری اقدار کے منافی ہے۔انہوں نے مزید کہا کہ آر ایس ایس نے آزادی کے بعد تقریباً 52 برسوں تک اپنے دفتر پر ترنگا لہرانے سے گریز کیا۔ اب ملک کی ترقی اور آزادی کی تاریخ میں اپنا حصہ جتانے کا بی جے پی کو کوئی حق نہیں۔وزیر اعلیٰ نے الزام عائد کیا کہ منموہن سنگھ کی حکومت کے دور میں امیر طبقے پر 32 فیصد انکم ٹیکس عائد تھا، لیکن نریندر مودی کی حکومت نے اسے گھٹا کر 25 فیصد کر دیا، جس سے امیروں کو فائدہ پہنچا جبکہ عام آدمی پر مہنگائی کا بوجھ مزید بڑھا دیا گیا۔انہوں نے کہا کہ کانگریس ایک ایسی جماعت ہے جس نے برطانوی سامراج کے خلاف طویل اور زبردست جدوجہد کی ہے، اور اب بھی ہم بی جے پی اور آر ایس ایس کی عوام دشمن پالیسیوں کا ڈٹ کر مقابلہ کریں گے۔ریاستی حکومت کی اسکیموں کا حوالہ دیتے ہوئے وزیر اعلیٰ نے بتایا کہ دودھ کی قیمت میں اضافے کا سارا فائدہ مویشی پروری کرنے والے کسانوں کو منتقل کیا گیا ہے۔ پانی، بجلی اور ٹرانسپورٹ کے نرخ کرناٹک میں ملک کی دیگر ریاستوں کے مقابلے میں سب سے کم ہیں۔سدارامیا نے مزید کہا کہ عالمی سطح پر خام تیل کی قیمتوں میں کمی کے باوجود مرکزی حکومت نے ڈیزل اور پٹرول کی قیمتیں بڑھا کر عوام کو دھوکہ دیا ہے۔آخر میں وزیر اعلیٰ نے کہا کہ بی جے پی اور آر ایس ایس جھوٹ کا سہارا لے کر عوام کو گمراہ کر رہے ہیں اور سماجی ہم آہنگی کو نقصان پہنچا رہے ہیں، مگر کانگریس عوامی طاقت کے بل پر سچائی کی جدوجہد جاری رکھے گی۔
Post a Comment