توہین رسالت کے الزام میں یتنال کے خلاف مقدمہ
بیجاپور، 9 اپریل (حقیقت ٹائمز)
ریاست کے بی جے پی سے معطل شدہ مقامی رکن اسمبلی بسون گوڈا پاٹل یتنال کے خلاف مبینہ طور پر اہانت رسول کے الزام پر پولیس نے مقدمہ درج کر لیا ہے۔ یہ ایف آئی آر بیجاپور کے گول گنبد پولیس اسٹیشن میں محمد حنان شیخ کی شکایت پر درج کی گئی ہے۔بتایا جاتا ہے کہ یتنال نے 7 اپریل کو ہبلی میں ایک عوامی جلسے سے خطاب کے دوران نبی کریم ﷺ کے بارے میں ایک ایسا جملہ کہا، جسے مسلمانوں نے سخت توہین آمیز قرار دیا۔ انہوں نے کہا تھا کہ "محمد پیغمبر بالاصاحب ٹھاکرے کے گھر پیدا ہوئے تھے"، جو مذہبی جذبات کو شدید ٹھیس پہنچانے والا بیان ہے۔شکایت گزار نے اپنے بیان میں کہا ہے کہ یتنال کا بیان نہ صرف اسلام اور مسلمانوں کے خلاف ہے بلکہ فرقہ وارانہ ہم آہنگی کے لیے بھی خطرہ ہے۔ اس بنیاد پر پولیس نے ( مذہبی جذبات کو مجروح کرنے کی نیت سے دانستہ و بدنیتی پر مبنی عمل )کے الزامات کے تحت مقدمہ درج کر کے تحقیقات شروع کر دی ہیں۔بسون گوڈا یتنال کو حال ہی میں بھارتیہ جنتا پارٹی نے پارٹی مخالف بیانات اور قیادت پر مسلسل تنقید کرنے کی پاداش میں 6 سال کے لیے معطل کر دیا تھا۔ معطلی سے قبل بھی یتنال کئی بار متنازع بیانات دے چکے ہیں، جن پر پارٹی اور عوامی حلقوں کی جانب سے تنقید ہوتی رہی ہے۔
عوامی و سماجی ردعمل
اس بیان کے خلاف ریاست کے کئی علاقوں میں مذمتی آوازیں بلند ہو رہی ہیں۔ سوشل میڈیا پر# ArrestYatnalاور #RespectProphetMuhammad جیسے ہیش ٹیگ ٹرینڈ کر رہے ہیں، جبکہ مختلف شہروں میں عوام نے احتجاجی مظاہرے بھی کیے ہیں۔ کئی مسلم تنظیموں اور سماجی رہنماؤں نے مطالبہ کیا ہے کہ یتنال کے خلاف سخت قانونی کارروائی کی جائے تاکہ آئندہ کسی کو اس طرح کی جرأت نہ ہو۔پولیس کا کہنا ہے کہ وہ ثبوتوں کی بنیاد پر تحقیقات کر رہی ہے اور ضرورت پڑنے پر یتنال کو طلب بھی کیا جاسکتا ہے۔ پولیس نے اس معاملے میں مکمل غیرجانبداری اور قانونی دائرے میں کارروائی کا یقین دلایا ہے۔
Post a Comment