بیٹے کے ہاتھوں باپ کا بہیمانہ قتل
حادثاتی موت کا ڈرامہ سی سی ٹی وی فوٹیج سے بے نقاب
ٹمکور ، 14 مئی (حقیقت ٹائمز)
ضلع میں ایک افسوسناک اور لرزہ خیز واقعہ سامنے آیا ہے جہاں ایک نوجوان نے اپنے والد کا گلا گھونٹ کر قتل کر دیا اور بعد ازاں موت کو حادثاتی ظاہر کرنے کی کوشش کی۔ یہ واقعہ 11 مئی کی رات اپولو آئس کریم فیکٹری میں پیش آیا، اور قتل کی حقیقت پولیس کو موصول ہونے والی شکایت اور سی سی ٹی وی فوٹیج کے ذریعے سامنے آئی۔پولیس کے مطابق، 55 سالہ نریش اپنے بیٹے سوریا کے ہمراہ فیکٹری میں موجود تھا۔ رات تقریباً 1:45 بجے دونوں کے درمیان معمولی تکرار شروع ہوئی جو بعد ازاں جھگڑے میں بدل گئی۔ سی سی ٹی وی فوٹیج میں دیکھا جا سکتا ہے کہ نریش اپنے بیٹے کو تھپڑ مارتا ہے، جوتے سے پیٹتا ہے اور ایک لکڑی کا ڈنڈا بھی اٹھاتا ہے۔ اس دوران سوریا کے ہاتھ میں سفید کپڑا موجود ہوتا ہے۔جھگڑے کے دوران جیسے ہی نریش پیٹھ پھیرتا ہے، سوریا اچانک سفید کپڑا اُس کے گلے میں ڈال کر زمین پر گرا دیتا ہے اور گلا گھونٹ کر قتل کر دیتا ہے۔ اس موقع پر سوریا کا ایک ساتھی بھی موجود تھا جو نریش کو ہلاک کرنے میں اُس کی مدد کرتا ہے۔ واردات کے بعد ملزمان نے نریش کی لاش کو بستر پر لٹایا اور اُس کی انگلیوں پر بجلی کے جھٹکے دے کر موت کو کرنٹ لگنے کا حادثہ ظاہر کرنے کی کوشش کی۔پولیس کا کہنا ہے کہ یہ منصوبہ کامیاب ہوتا دکھائی دے رہا تھا، تاہم نریش کی بہن سویتا کو شک ہوا، جس پر اُس نے پولیس سے رجوع کیا۔ جب پولیس نے فیکٹری کے سی سی ٹی وی کیمروں کی فوٹیج دیکھی تو قتل کی ساری حقیقت سامنے آ گئی۔فوری کارروائی کرتے ہوئے پولیس نے سوریا کو گرفتار کر لیا ہے، جبکہ اُس کا ساتھی ابھی تک مفرور ہے۔ پولیس نے ملزم کی تلاش تیز کر دی ہے اور واقعے کی مکمل تفتیش جاری ہے تاکہ قتل کی اصل وجہ اور پس منظر کا پتہ لگایا جا سکے۔ فی الحال خاندانی تنازعہ یا ذاتی رنجش کو ممکنہ وجہ تصور کیا جا رہا ہے۔مزید تحقیقات جاری ہیں۔
Post a Comment