ہمارے ملک کی ذات پات کا نظام ٹھہرے ہوئے پانی کی مانند ہے۔ سدارامیا
ہم سب کی ذمہ داری ہے کہ ہم دستور کی حفاظت کریں
بنگلورو، 3 مئی (حقیقت ٹائمز)
وزیراعلیٰ سدارامیا نے آج بنگلورو کے یلہنکا میں ڈاکٹر بی آر امبیڈکر کے 14 فٹ اونچے کانسے کے مجسمے کی نقاب کشائی کی۔ اس موقع پر خطاب کرتے ہوئے انہوں نے کہا کہ اگر ہم دستور کی حفاظت کریں گے تو ہمارے حقوق بھی محفوظ رہیں گے۔ دستور کا تحفظ ہم سب کی مشترکہ ذمہ داری ہے۔سدارامیا نے کہا کہ بابا صاحب امبیڈکر نے اس ملک کو ایسا اعلیٰ اور شاندار دستور دیا، جو اس وقت کی سماجی صورتحال اور ذات پات کے نظام کو بخوبی سمجھتے تھے۔ انہوں نے ہمیشہ اس بات پر زور دیا کہ جب تک ذات پات کا نظام موجود ہے، تب تک تحفظات (ریزرویشن) کا نظام بھی باقی رہنا چاہیے۔وزیراعلیٰ نے کہا کہ ’’ہمارے ملک میں ذات پات کے نظام میں کوئی حرکت نہیں، یہ بالکل ٹھہرے ہوئے پانی کی طرح ہے۔ انسان خواہ دولت مند بن جائے یا مفلس، وہ آخرکار اپنی پیدائشی ذات کا غلام ہی رہتا ہے۔ یہی وہ نظام ہے جس کو امبیڈکر نے اپنی زندگی میں بدلنے کی کوشش کی۔‘‘انہوں نے مزید کہا کہ بابا صاحب امبیڈکر کا ماننا تھا کہ جب تک محروم، پسماندہ، مظلوم اور استحصال زدہ طبقات کو مساوی مواقع نہیں دیے جاتے، اس وقت تک آزادی کی اصل روح حاصل نہیں ہوسکتی۔سدارامیا نے کہا کہ ہمیں سیاسی آزادی تو ملی ہے، مگر سماجی اور معاشی برابری ابھی بھی ایک خواب ہے۔ جب تک سماجی انصاف نہیں ملے گا، برابری ممکن نہیں۔ ہماری حکومت اسی اصول کو بنیاد بنا کر اپنے فلاحی منصوبے تیار کر رہی ہے۔وزیراعلیٰ نے زور دیا کہ بابا صاحب امبیڈکر نے تعلیم، تنظیم اور جدوجہد کے تین بنیادی اصول دیے۔ ان کا ماننا تھا کہ تعلیمی پسماندگی کو دور کیے بغیر برابری کا خواب ممکن نہیں۔ انہوں نے کہا کہ جو لوگ رسم الخط اور تعلیم سے محروم ہیں، انہیں آگے بڑھ کر تعلیم حاصل کرنی چاہیے۔ یہی خودداری، علم اور تنظیم کی بنیاد ہے۔سدارامیا نے کہا کہ کسی کو پیچھے نہ دھکیلا جائے، بلکہ کوشش کی جائے کہ سب کو آگے لایا جائے۔ اگر کسی کو آگے لانا ممکن نہ ہو تو کم از کم پیچھے نہ دھکیلا جائے۔انہوں نے کہا کہ بابا صاحب امبیڈکر نے اپنی تعلیم کو ذاتی مفاد کے لیے نہیں بلکہ سماجی برابری کے لیے استعمال کیا۔ ان کے نظریات آج بھی زندہ ہیں اور مجسمے ان کے خیالات کے فروغ کا ذریعہ بنیں۔اس موقع پر وزیراعلیٰ نے یلہنکا کے رکن اسمبلی وشواناتھ کی پارٹی سے بالاتر ہوکر کام کرنے کے جذبے کو سراہا اور کہا کہ ان کے حلقے میں دلت اور پسماندہ طبقات کی کثرت ہے، اس لیے ان کی ترقی کے لیے مالی مطالبات پر غور کیا جائے گا۔
Post a Comment