کرناٹک سے حجاجِ کرام کی روانگی کا آغاز، وزیر اعلیٰ نے نیک تمناؤں کے ساتھ رخصت کیا
سدارامیا کا محبت، بھائی چارے اور قومی ہم آہنگی کا پیغام
ریاستی حکومت سب کے ساتھ انصاف کرے گی، کسی کا امتیاز نہیں ہوگا: وزیر اعلیٰ کی یقین دہانی
بنگلور 28 اپریل (حقیقت ٹائمز)
کرناٹک سے عازمینِ حج کی روانگی کا سلسلہ پورے جوش و خروش کے ساتھ شروع ہو چکا ہے۔ اس مبارک سفر پر روانہ ہونے والے خوش نصیب عازمین کے اعزاز میں بنگلورو کے حج بھون میں ایک روح پرور اور پروقار تقریب کا انعقاد عمل میں آیا جس میں وزیر اعلیٰ سدارامیا نے خصوصی شرکت کی اور راست حج پروازوں کا افتتاح کیا ۔ اس موقع پر وزیر اعلیٰ نے عازمین کو دل کی گہرائیوں سے مبارکباد پیش کی اور انہیں اس مقدس سفر کے لیے نیک تمناؤں کے ساتھ رخصت کیا۔ انہوں نے کہا کہ حج نہ صرف ایک مذہبی فریضہ ہے بلکہ روحانی تطہیر اور انسانی اخوت کے فروغ کا بھی عظیم ذریعہ ہے۔ انہوں نے عازمین سے اپیل کی کہ وہ مقدس مقامات پر پہنچ کر ہندوستان کی سلامتی، بھلائی اور ریاست کرناٹک کی ترقی و خوشحالی کے لیے خصوصی دعائیں کریں۔اس سال ریاست سے تقریباً 8635 عازمین حج روانہ ہو رہے ہیں، جو آئندہ ماہ کی 15 تاریخ تک 27 پروازوں کے ذریعے سفر کریں گے۔وزیر اعلیٰ نے کہا کہ ہندوستان اپنی گنگا جمنی تہذیب، صدیوں پرانی رواداری اور بھائی چارے کے جذبے کے لیے دنیا بھر میں پہچانا جاتا ہے اور ہمیں چاہیے کہ ہم اس مثبت پیغام کو پوری دنیا میں عام کریں۔
انہوں نے اس بات پر زور دیا کہ حج کے موقع پر عازمین اللہ تعالیٰ سے دعا کریں کہ دنیا میں امن، محبت اور بھائی چارہ قائم رہے اور ہندوستان ہر شعبہ میں ترقی کرے۔ سدارامیا نے کہا کہ مذہبی رسومات کی ادائیگی کے ساتھ ساتھ انسانی اقدار کا فروغ بھی ایمان کا حصہ ہے اور یہی پیغام لے کر عازمین کو اس سفر پر روانہ ہونا چاہیے۔وزیراعلیٰ نے کہا کہ تمام مذاہب کے ماننے والے ایک ہی ماں کی اولاد ہیں اور ایک دوسرے کے ساتھ محبت، اخوت اور بھائی چارے کے جذبے سے زندگی گزارنا ہی سماج کے لیے سب سے بڑی خدمت ہے۔انہوں نے کہا کہ انسانیت ہی تمام مذاہب کی بنیاد ہے اور کوئی بھی مذہب نفرت یا دشمنی کا درس نہیں دیتا۔ انہوں نے زور دے کر کہا کہ ہمیں نفرت یا تعصب کی بنیاد پر کسی بھی سماجی ترقی کی امید نہیں رکھنی چاہیے، بلکہ مساوات، محبت اور باہمی احترام کے ساتھ ہی ایک بہتر سماج کی تشکیل ممکن ہے۔انہوں نے کہا کہ ہمارا آئین رواداری اور باہمی ہم آہنگی کی تعلیم دیتا ہے اور ہر فرد کو آزادی، مساوات اور بھائی چارے کے اصولوں پر عمل پیرا ہونے کی ضرورت ہے۔ انہوں نے دو ٹوک انداز میں کہا کہ ان کی حکومت کسی ایک مذہب کی خوشنودی کے لیے نہیں، بلکہ تمام مذاہب اور تمام طبقات کی فلاح و بہبود کے لیے کام کر رہی ہے۔انہوں نے واضح کیا کہ چار لاکھ نو ہزار کروڑ روپے کے مجموعی ریاستی بجٹ میں مسلمانوں کے لیے 4500 کروڑ روپے مختص کیے گئے ہیں جو کوئی غیر معمولی رقم نہیں ہے بلکہ ان کا جائز حق ہے۔ وزیراعلیٰ نے کہا کہ ریاست کی دولت پر سب کا یکساں حق ہے اور مساوی ترقی ہی سماجی ہم آہنگی کی بنیاد ہے۔سدارامیا نے کہا کہ ملک کی آزادی کے بعد یہاں رہ جانے والے مسلمان بھی مکمل بھارتی شہری ہیں اور انہیں اسی حیثیت سے جینا چاہیے۔ انہوں نے زور دیا کہ ہندو، مسلمان، عیسائی سب کو بھائی چارے اور مساوات کے جذبے کے ساتھ جینا ہوگا تاکہ ایک مثالی معاشرہ قائم ہو سکے۔وزیراعلیٰ نے اس بات پر بھی زور دیا کہ ریاستی حکومت آئین کے اصولوں پر سختی سے کاربند ہے اور کسی دباؤ یا تعصب کے تحت فیصلے نہیں کرتی۔ انہوں نے کہا کہ ہماری حکومت کا اصل مقصد آئین کے اغراض و مقاصد کی تکمیل ہے، اور جمہوریت و آئین کے تحفظ کے لیے ہر ممکن کوشش کی جائے گی۔اس موقع پر سدارامیا نے اعلان کیا کہ منگلورو میں حج بھون کی تعمیر کا سنگ بنیاد 16 مئی کو رکھا جائے گا۔اسی طرح ضلع گلبرگہ میں بھی حج بھون کی تعمیر کے لیے وزیر ضمیر احمد خان سنگ بنیاد رکھیں گے۔ بنگلورو کے موجودہ حج بھون میں رہائش کی سہولیات بہتر بنانے کے لیے 10 کروڑ روپے کی گرانٹ منظور کی گئی ہے۔وزیراعلیٰ نے مسلمانوں میں تعلیم کے فروغ پر زور دیتے ہوئے کہا کہ سچر کمیٹی رپورٹ کے مطابق مسلمانوں میں شرح تعلیم تشویشناک حد تک کم ہے۔انہوں نے کہا کہ خود داری اور باوقار زندگی گزارنے کے لیے تعلیم حاصل کرنا ناگزیر ہے۔ ہر مسلمان کو تعلیم پر خصوصی توجہ دینی چاہیے تاکہ سماجی و اقتصادی ترقی ممکن ہو سکے۔وزیراعلیٰ نے کہا کہ ریاست میں کسی کے ساتھ ناانصافی نہیں ہوگی اور سب کو مساوی تحفظ فراہم کیا جائے گا۔انہوں نے مزید کہا کہ قانون کی نظر میں سب برابر ہیں اور کرناٹک میں کسی کو بھی خوفزدہ ہونے کی ضرورت نہیں ہے۔اس موقع پر ریاستی وزراء ضمیر احمد خان ،رحیم خان ،کرشنا بایرے گوڈا، کے علاوہ منتخب نمائندوں میں ڈاکٹر ناصر حسین ،نصیر احمد ،سلیم احمد،بلقیس بانو ،عبدالجبار ، کنیز فاطمہ، ،اے سی سرینواس، کے علاوہ امیر شریعت مولانا صغیر احمد خان رشادی ،کے علاوہ مولانا مقصود عمران رشادی ، سابق وزیر آر روشن بیگ ، کے علاوہ متعدد دانشوران ، علمائے کرام ،منتخب نمائندے موجود رہے۔ قرأت ونعت ے جلسے کا آغاز ہوا۔محمد اعظم شاہد نے نظامت کی۔حج کمیٹی چیرمین ذوالفقارعلی ٹیپو نے استقبال کیا۔
Post a Comment